ارق الجبل والحر ماهوب مملوك
طيب الولد من طيب خاله وعمه . . .
وخاو الرجال الي على العز خاووك
واحذر تخاويلك من الناس رمه . . .
لاتخاوي الرديان لو زين اللوك
ترا الردي مايكسب الا المذمه . . .
خاو الشجيع اللي ليا قلت له دوك
سد اللزوم ولا شيء يهمه . . .
وان كان خاويت الردي مابه شكوك
وانته شجيع تصير مثله ويمه . . .
اخذ مثل لو ينبت الورد بالشوك
محدً على ماقيل يقدر يلمه . . .
وان جاك شايب بالعمر كنه ابوك
الشايب اللي فوق راسه معمه . . .
هذاك اخذ شوره ترى الشور مبروك
يشيل هم الناس من فوق همه . . .
وان كان ربعك للمهمات دزوك
خلك على ماقيل قد المهمه . . .
هذا كلامي لا تكبه وانا خوك
للبير قاعه يوم لضلع قمه . . .
ليست هناك تعليقات:
إرسال تعليق